RANJANGATE SCANDAL – හත්පොළේ ගාගත් රන්ජන්ගේ හඬපට නාඩගම
Posted on January 11th, 2020
ගයාන් කුමාර වීරසිංහ උපුටා ගැන්ම සිළුමිණ
පසුගිය එක්සත් ජාතික පෙරමුණු ආණ්ඩුවේ කියුම් කෙරුම් රන්ජන් රාමනායක මන්ත්‍රීවරයාගේ හඩපට ගොන්නෙන් එකිනෙක එළියට එමින් පවතී. එම හඬපට මේ වන විට ඇත්තේ පොලීසිය සතුව පමණක් නොවේ. ඒවා සමාජ ජාල වෙබ් අඩවිවල උණු උණුවේ හුවමාරු වෙයි.
අපේ රටේ දේශපාලන සූදුවේ තරම කියා පාන රන්ජන් රාමනායකගේ දුරකතන සංවාද එළියට ඒමේ කතාවද අපූරු එකකි. බස්නාහිර පළාත් උතුරු දිසා අපරාධ කොට්ඨාසය සඳහන් කරන ආකාරයට එදා ජනවාරි 05 වෙනිදාය. වේලාව රාත්‍රී 7.30 ට පමණ ඇත. කෝට්ටේ පාගොඩ පාරේ පිහිටි බස්නාහිර පළාත් අපරාධ කොට්ඨාසයට ගොඩ වන්නේ ත්‍රිරෝද රථ රියදුරෙකි.
පැලවත්තේ පදිංචිකරුවකු වන ඔහු පොලිස් නිලධාරීන් අතට පත් කරන්නේ නිල් පැහැති සිපරයක් සහිත ඩයරි කවරයක් සහ ඒ තුළ දමා වසා තිබුණු පරිගණකවලට පිටතින් සවිකරන හාඩ් ඩිස්ක් එකකි. මාදිවෙල පිහිටි මන්ත්‍රී නිල නිවාස ඉදිරිපිටින් නුගේගොඩට යෑමට යැයි කියා තම ත්‍රිරෝද රථයට ගොඩ වුණු පුද්ගලයකුට ඒවා අමතකව ගොස් ඇති බව ඔහු කීවේය. අඳුර වැටී තිබුණු මොහොතක වූවත් එම පුද්ගලයා අවු කන්නාඩියක් පැලඳ තොප්පියක් දමාගෙන සිටියේය. නුගේගොඩට යන්නට යැයි කියා ගොඩවූවත් ඔහු බැද්දගාන ක්‍රීඩාංගණය අසලින් බැස ගිය බවත් ඔහු යම් කලබලයකින් සිටිනු දක්නට ලැබුණු බවත් රියදුරා අපරාධ කොට්ඨාශයයේ නිලධාරීන්ට පවසා තිබිණි.
ත්‍රිරෝද රථයට ගොඩ වූ මොහොතේ සිට ඔහුට දුරකතන ඇමතුම් ලැබුණු බවත් රන්ජන් ඇමති සතපහකට වැඩක් නැහැ. අපිටත් කැත වැඩක් කළේ යැයි පවසනු තමන්ට ඇසුණු බවද රියැදුරා කීවේය. නුගේගොඩ ගමන අතර මග නතර කරමින් ත්‍රිරෝද රථයෙන් ඔහු හදිසියේම බසින්නේද දුරකතන ඇමතුමකට අනුව බවද රියැදුරා කීවේය.
ඒ මහත්තයා බැහැලා ගියාට පස්සේ මම නුගේගොඩ පැත්තට යනකොට වාහනයක් ඉස්සර කරන්න හැදුවා. එකපාරම බ්‍රේක් එක පෑගුණා. ඒත් එක්කම පිටිපස්සේ සීට් එක ළඟින් දඩාස් ගාල ශබ්දයක් ඇහුණා. මං ත්‍රීවීල් එක අයිනකට කරල බැලුවා. එතකොටයි දැක්කේ නිල් පාට කවරෙක දාපු යමක් පිටිපස්සේ බිම වැටිලා තියෙනවා. ඒක මාදිවෙලින් නැග්ග මහත්තයාගේ බව මට හිතුණා. මං ත්‍රීවීල් එක හරවාගෙන ඒ මහත්තයා බැස්ස තැනට ගියා. මහත්තයා හිටියේ නැහැ. ත්‍රීවීල් එක හරවාගෙන ආපහු නුගේගොඩ පැත්තට යනකොට පොලීසියේ බෝඩ් එක දැක්කා. මට හිතුණා පොලීසියට දුන්නොත් ඒක ඒ මහත්තයා අතට ලැබෙයි කියලා ත්‍රිරෝද රථ රියදුරා පොලිස් නිලධාරියා අතට ඒ හාඩ් ඩිස්ක් එක පත් කරමින් කීවේ එවනි කතාවකි.
පොලීසිය කියන්නේ ත්‍රිරෝද රථ රියදුරා ළඟ තබාගෙන එම හාඩ් ඩිස්ක් එක පොලීසියේ පරිගණකයෙන් පරීක්ෂාවට ලක් කළ බවය. එහිදී පෙනී යන්නේ ඒ තුළ ඇත්තේ දේශපාලන රහස් ගොන්නක් බවකි. එම හාඩ් ඩිස්ක් එක අතහැර ගිය පුද්ගලයා කවුරුන්දැයි පැහැදිලි නැතත් එහි තිබුණේ හිටපු රාජ්‍ය ඇමතිවරයෙකු වූ රන්ජන් රාමනායක මහතා විවිධ පුද්ගලයන්ට ලබාගත් ඇමතුම් සහ ඔහුගේ ජංගම දුරකතනයට ලැබුණු ඇමතුම්වල පටිගත කිරීම් බව පෙනී ගියේය.
සංවේදී පොලිස් විමර්ශනවලට මෙන්ම අධිකරණයේ විභාග වන නඩු කටයුතුවලටත් රන්ජන් රාමනායක මහතා මැදිහත් වන අයුරු එම හඬපටවලින් පැහැදිලිවම පෙනී යන්නට වූ බැවින් බස්නාහිර දකුණු දිසා අපරාධ කොට්ඨාසයේ නිලධාරීන් ඒ ගැන කියන්නේ තමන්ගේ ඉහළ නිලධාරීන්ටය. එහිදී උපදෙස් ලැබෙන්නේ ත්‍රී රෝද රථ රියදුරාගේ ප්‍රකාශයක් සටහන් කර හාඩ් ඩිස්ක්එක පොලිස් භාරයට ගන්නා ලෙසය.
එම හාඩ් ඩිස්ක් එකේ ඇති හඬපට ප්‍රමාණය ලක්ෂ එක හමාරකට අධිකය. එම හඬපට විශ්ලේෂණයේදී බස්නාහිර දකුණු දිසා අපරාධ කොට්ඨාසයේ නිලධාරීන්ට පෙනී යන්නේ ජාතික ආරක්ෂාව සම්බන්ධයෙන්ද බොහෝ දේවල් එහි අන්තර්ගතව ඇති බවය. එහි ඇති බරපතළ තත්ත්වය වටහාගත් පොලිස් ප්‍රධානීන් ඒ ගැන ඉහළ බලධාරීන්ද දැනුවත් කරමින් තීරණය කරන්නේ එම හඬපට සම්බන්ධයෙන් පුළුල් විමර්ශනයක නිරත වන්නටය. රන්ජන් රාමනායක මන්ත්‍රීවරයාගේ මාදිවෙල පිහිටි නිල නිවස සෝදිසි කරන්නට අධිකරණයෙන් වරෙන්තුවක් ලබාගන්නේ ඒ අනුවය.
සිය නිවස පොලීසිය සෝදිසි කරන්නේ ඇයි දැයි මන්ත්‍රීවරයා දැන සිටියත් ඒ ගැන ඔහුට වගේ වගක් නොවීය. ෆේස් බුක් සමාජ ජාල ඔස්සේ ඔහු ඊටද ප්‍රචාරයක් දුන්නේ රටේ සියලුම මාධ්‍ය ආයතන නියෝජිතයන්ද එහි ගෙන්වා ගනිමිනි. ඒ අතර ඔහු තමන්ට හිතවත් පාර්ලිමේන්තු මන්ත්‍රීවරුන්වද එහි කැඳවන්නට වග බලා ගත්තේය.
අපරාධ පරීක්ෂණ දෙපාර්තමේන්තුවේ ඉහළ නිලධාරීන් , අල්ලස් හෝ දූෂණ විමර්ශන කොමිසමේ ඉහළ නිලධාරීන් සහ මූල්‍ය අපරාධ කොට්ඨාසයේ ඉහළ නිලධාරීන් සමඟ එවකට විපක්ෂයේ සිටි මහින්ද රාජපක්ෂ ආණ්ඩුවේ දේශපාලනඥයන්ට එරෙහිව නඩු කටයුතු සහ විමර්ශන සිදු විය යුතු ආකාරය ගැන කෙරෙන කතාබහ ඇතුළත් සංයුක්ත තැටි ගොන්නක්ම හමුවන්නේ එවිටය. සොයාගත් ඇතැම් සංයුක්ත තැටි අතර අසභ්‍ය චිත්‍රපට කිහිපයක්ම තිබිණි.
පොලිස් නිලධාරීන් පුදුමයට පත් වන්නේ ඒ කිසිවෙකින් නොව, අපරාධ පරීක්ෂණ දෙපාර්තමේන්තුව කළ සංවේදී විමර්ශන ගොනු කිහිපයකම පිටපත් එහෙම පිටින්ම එහි තිබී හමුවීමෙනි. රගර් ක්‍රීඩක වසීම් තාජුඩීන්, මාධ්‍යවේදී ප්‍රගීත් එක්නැලිගොඩ සහ ද නේෂන් පුවත්පතේ සහකාර කර්තෘ කීත් නොයාර්ට පහරදීමට අදාළ විමර්ශන ගොනු ද ඒ අතර විය.
සෝදිසියේදී පොලිස් නිලධාරීන්ගේ විශේෂ අවධානයකට යොමු වන්නේ නිවස තුළ තිබුණු ගිනි අවියක් කෙරෙහිය. එම අවිය මන්ත්‍රීවරයෙකු ලෙස ඔහුට රජයෙන් නිකුත් කර තිබූවකි. එහෙත් ඒ වන විටත් එම අවියේ බලපත්‍රය වසර කිහිපයකින්ම අලුත් කර නොතිබිණි. එම අවිය සමඟ ඊට යොදන පතොරම් 127ක්ද එහි තිබිණි. මන්ත්‍රීවරයකුට ගිනි අවිය සමඟ නිකුත් කරන්නේ පතොරම් 20ක් වූවත් පතොරම් 127ක් තිබීම ගැන පොලීසියට ඇති වන්නේ සැකයකි. රන්ජන් රාමනායක මන්ත්‍රීවරයා අත්අඩංගුවට ගැනීමට පොලීසිය තීරණය කරන්නේ ඒ නිසා ය.
මේ වන විට සමාජ මාධ්‍ය ජාලවල සංසරණය වන්නේ පොලීසියට හසුවූ ලක්ෂ ගණනක් වූ රන්ජන් රාමනායක මන්ත්‍රීවරයාගේ හඬපටවලින් කිහිපයක් පමණි. එම හඬපටවලින් යහපාලන ආණ්ඩුවේ රාජ්‍ය ඇමතිවරයකුව සිටි රන්ජන් රාමනායක මහතා අපරාධ පරීක්ෂණ දෙපාර්තමේන්තුවේ විමර්ශනවලට මෙන්ම අධිකරණයේ නඩු කටයුතුවලට කළ බලපෑම් ගැන රහස් ගොන්නක්ම හෙළි වන්නට පටන්ගෙන තිබේ.
එක් හඬපටයක ඇත්තේ රන්ජන් රාමනායක මන්ත්‍රීවරයා කොළඹ මහේස්ත්‍රාත් අධිකරණයේ විනිසුරුවරයෙකු සමග කෙරෙන කතාබහකි. එයින් පෙනී යන්නේ එක්සත් ජනතා නිදහස් සන්ධානයේ කොළඹ දිස්ත්‍රික් පාර්ලිමේන්තු මන්ත්‍රී ඒ.එච්.එම්. ෆවුසි මහතාගේ නඩුවක් සම්බන්ධයෙන් එම කතාබහ සිදු වන බවකි. එම ඇමතුම විනිසුරුවරයාට යොමු වන විට විනිසුරුවරයා සිටින්නේ අධිකරණයට ගමන් කරමිනි. එම නඩුව රජයේ වාහනයක් අවභාවිතා කිරීමක් සම්බන්ධයෙන් අල්ලස් කොමිසම විසින් ෆවුසි මන්ත්‍රීවරයාට ගොනු කරනු තිබූවකි. රන්ජන් රාමනායක මන්ත්‍රීවරයා විනිසුරුවරයාගෙන් ඉල්ලා සිටින්නේ ෆවුසි හිරේ දමන ලෙසය.
ආණ්ඩුවම බේරගන්න පුළුවන්. ඔබතුමාගේ කියන තැනකට වඳින්නම්. ඕනේ උදව්වක් කරන්නම්. පැයකට ඇතුළට දාලා දෙන්න රන්ජන් රාමනායක මන්ත්‍රීවරයා ගෝඨාභය රාජපක්ෂ මහතා හිරගත කරන්නට විනිසුරුවරයා සමඟ කතාබහ කරන්න අයුරු තවත් හඬපටයක ඇතැයි පොලිස් තොරතුරුවලින් කියැවෙයි
එහිදී විනිසුරුවරයාගේ පිළිතුර වන්නේ තමන් ඉල්ලා සිටින ලෙසට පැමිණිල්ලක් කළහොත් ඒ දේ ඉටු කර දිය හැකි බවය.
රන්ජන් රාමනායක මන්ත්‍රීවරයා දුරකතන සංවාද පවත්වා ඇත්තේ එම විනිසුරුවරයා සමඟ පමණක් නොවේ. ඔහු විනිසුරුවන්ට බලපෑම් කර ඇත්තේ එවකට විපක්ෂය නියෝජනය කළ රාජපක්ෂ ආණ්ඩුවේ දේශපාලනඥයන් සිරගත කරන්නටය. ඒ කියැවෙන නම් අතර බැසිල් රාජපක්ෂ, උදය ගම්මන්පිල, ජොන්ස්ටන් ප්‍රනාන්දු, නාමල් රාජපක්ෂ නම් ඇත්තේ ඉදිරියෙනි. උදය ගම්මන්පිල මන්ත්‍රීවරයාව සිරකරන්නට කතාබහ ඇති වන්නේ පොලිස් විශේෂ විමර්ශන ඒකකයේ නිලධාරියෙකු සමඟිනි.
මරණීය දණ්ඩනයට නියම වී සිටින හිටපු පාර්ලිමේන්තු මන්ත්‍රී දුමින්ද සිල්වා මහතා සිරගත කිරීම මෙන්ම මරණීය දණ්ඩනයෙන් දඬුවම් ලබාදීම පිළිබඳ ද එම හඬපටවල කතා පවතී. ඒ සඳහා අපරාධ පරීක්ෂණ දෙපාර්තමේන්තුවේ නිලධාරීන් මෙන්ම දුමින්ද සිල්වා මහතාට මරණිය දණ්ඩනය නියම කළ මහාධිකරණ විනිසුරුවරියකගේද සම්බන්ධයක් ඇති බව හඬපට ඔස්සේ පැහැදිලිවම හෙළි වෙයි.
අපරාධ පරීක්ෂණ දෙපාර්තමේන්තුවේ එවකට සිටි අධ්‍යක්ෂ ජ්‍යෙෂ්ඨ පොලිස් අධීකාරී ශානි අබේසේකර මහතාගේ නමද ඇත්තේ එම කුමන්ත්‍රණකරුවන්ගේ ලැයිස්තුවේය. විනිසුරුවරිය සිටින්නේද ඒ ගොන්නේමය. මේ වන විට සිටින්නේ විශ්‍රාම ගොස් සිටින මේ විනිසුරුවරිය අධියාචනාධිකරණ විනිසුරුවරියක ලෙස විශ්‍රාම ගන්නට උත්සාහ දරා ඇති බව එම හඬපටවලින් පැහැදිලි වන කරුණකි. ඇයට ඒ සඳහා බාධාවක් වී ඇත්තේ ජ්‍යෙෂ්ඨතා ලේඛනයේ ඇය සිටියේ නව වැනි තැනේ වන බැවිනි. ඇය සිය උසස් වීම වෙනුවෙන් රන්ජන් රාමනායක මහතාට බැගෑපත් වන්නේ දුමින්ද සිල්වාව පෝරකයට යැවීමේ තීන්දුව ලබාදීමෙන් අනතුරුවය. එම හඬපටයට අනුව සැක පළ වන්නේ ඇයට උසස් වීමක් පෙන්වමින් දුමින්ද සිල්වා පෝරකයට යවන්නට යම් කුමන්ත්‍රණයක් සිදු වී ඇති බවකි.
2016 සැප්තැම්බර් 18 වැනිදා දුමින්ද සිල්වා මහතා ඇතුළු භාරත ලක්ෂමන් ඝාතනයේ චූදිතයන් 13 දෙනාම අධිකරණයට එන්නේ සිනාමුසු මුහුණිනි. ඒ අධිකරණය ගැන ඒ තරමට විශ්වාසයක් ඔවුන්ට තිබුණු බැවිනි. සිදු වන්නේ අනපේක්ෂිත ලෙස දුමින්ද සිල්වා මහතා ඇතුළු පස් දෙනෙකුට මරණීය දණ්ඩනය නියම කරමින් සෙසු චූදිතයන් නිදහස් කිරීමය.
එපමණක් නොව, බුද්ධි අංශ නිලධාරීන් සිරගත කිරීම් ගැනද ශානි අබේසේකර සහ රන්ජන් රාමනායක මන්ත්‍රීවරයා අතර අදහස් ගොන්නක්ම හුවමාරු වී ඇත. හමුදා බුද්ධි අංශ ප්‍රධානියාව සිටි බ්‍රිගේඩියර් සුරේෂ් සලෙයි මහතා හමුදා බුද්ධි අංශයෙන් ඉවත් කිරීමේ කුමන්ත්‍රණය දියත් වන්නේ ශානි අබේසේකර සහ රන්ජන් රාමනායක මන්ත්‍රීවරයාගේ සැලසුමකට අනුව බව හඬපටවලින් පැහැදිලි වෙයි.
සන්ඩේ ලීඩර් කර්තෘ ලසන්ත වික්‍රමතුංග, ඇවන්ගාඩ් පාවෙන අවි ගබඩාව සහ භාරත ලක්ෂමන් ඝාතනය සම්බන්ධයෙන් මූලික විමර්ශන එකල සිදු කරන්නේ එවකට අපරාධ පරීක්ෂණ දෙපාර්තමේන්තුවේ පොලිස් පරීක්ෂකවරයකුව සිටි මෙරිල් රන්ජන් ළමාහේවා මහතාය. ශානිගේ සැලසුම්වලට අනුව ඔහු එදා ඒ විමර්ශන සිදු කරන්නට ගියේ නැත. දුමින්ද සිල්වා මහතා නිදහස ලබන්නට නියමිත ව තිබුණේ ඔහුගේ විමර්ශන මුල් කරගෙනය. එසේම ලසන්ත වික්‍රමතුංග ඝාතනයට සැක කරන්නේ කාගේ ආරක්ෂකයන්දැයි මුලින්ම සොයා ගන්නේද මෙරිල් රන්ජන්ගේ විමර්ශන ඔස්සේය. මෙරිල්ට වැඩි කලක් විමර්ශන කරන්නට ඉඩක් නොවීය. ඔහුව නමට පමණක් තබාගෙන වෙනත් නිලධාරීන් යොදා තමන්ට වුවමනා ලෙස ශානි අබේසේකර එම විමර්ශන සිදු කළේය. ඒ ගැන සිය විරෝධතා දක්වන විට මෙරිල්ව යාපනයට මාරු කළේය. මෑතක දී ඔහුව අත්අඩංගුවට ගැනීමටද සූදානම් වන්නේ ලසන්ත ඝාතනයේ කරුණු වසන් කළේ යැයි චෝදනා නඟමිනි. එය ගැස්සෙන්නේ අපරාධ පරීක්ෂණ දෙපාර්තමේන්තුව ඔහු කැඳවා කෙරුණු ප්‍රශ්න කිරීම්වලදී ලසන්ත ඝාතනයේ සැකකරුවන් කවුරුන්දැයි ඔහු තමාගේ කටඋත්තරයේ ලියා ගන්නැයි කී විටය.
දෙබරට ගල් ගැසුවාක් මෙන් අපරාධ පරීක්ෂණ දෙපාර්තමේන්තුවේ ලොක්කන් ඇවිස්සෙන්නේ ඒත් එක්කමය. මෙරිල් අත්අඩංගුවට ගැනීමේ සැලසුම වෙනස් විය. ලසන්ත ඝාතනයේ සැකකරුවන් ගැන මෙරිල් කී කිසිවක් සටහන් නොවීය. ඔහු නිදහස් කර යැව්වේය. එ් බවක්ද දැන් රන්ජන් රාමනායක මන්ත්‍රීවරයාගේ හඬපට ගොන්නේ ඇති ඇතැම් හඬපටවලින් තහවුරු වෙයි.
එම හඬපටවල ශානි අබේසේකර මහතා සිය තනතුරද හෑල්ලුවට ලක් කරමින් රන්ජන් රාමනායක මන්ත්‍රීවරයාගේ නිවසේ වළං හෝදන්නට පවා එන බව කියාද තිබේ. ඒත් එක්කම මෙතෙක් ඔහුගේ මෙහෙයැවීමෙන් කළ අපරාධ විමර්ශන පවා මේ වන විට අභියෝගයට ලක් වී තිබේ. එම හඬපටයේ ආන්දෝලනාත්මක බව ශානි අබේසේකර මහතාගේ වැඩ තහනම් කිරීමට ජාතික පොලිස් කොමිසම තීරණය කරන තැනට පත් විය. වැඩබලන පොලිස්පති සී.ඩී. වික්‍රමරත්න මහතාට පොලිස් කොමිසම දැනුම් දෙන්නේ ශානි අබේසේකර මහතා සම්බන්ධයෙන් සති දෙකක් තුළ විනයානුකූල විමර්ශනයක් පවත්වා වාර්තාවක් ලබාදෙන ලෙසය. ඒ අනුව නියෝජ්‍ය පොලිස්පති මුදිත පුස්සැල්ල මහතා යටතේ මේ වන විට ශානි අබේසේකර මහතා සම්බන්ධයෙන් විනය පරීක්ෂණයක් ක්‍රියාත්මක වෙයි. එහි අධීක්ෂණ නිලධාරියා වන්නේ ජ්‍යෙෂ්ඨ පොලිස් අධිකාරී දේශබන්දු තෙන්නකෝන් ය.
විනය පරීක්ෂණයට අමතරව දැන් එම හඬපට ගැනද පුළුල් විමර්ශනයක් කොළඹ අපරාධ කොට්ඨාසයේ අධ්‍යක්ෂක පොලිස් අධිකාරී ජී.ජේ. නන්දන මහතා යටතේ සිදු වෙයි. එම විමර්ශන අවසානයේදී ශානි අබේසේකර මහතා ඇතුළු කිහිප දෙනෙක්ම අත්අඩංගුවට පත් වීමට ඇති ඉඩකඩ බොහෝය. ඒත් එක්කම හඬපටවලින් හෙළි වන විනිසුරුවරුන් ගැනද විශේෂ විමර්ශනයක් අධිකරණ සේවා කොමිසම මඟින් සිදුවනු ඇත.
ඇතැම් හඬපටවල යහපාලන ආණ්ඩුවේම මැති ඇමතිවරුන් හිරේ දමන්නට රන්ජන් කතාබහ කරයි. ළාබාල ගණිකාවන් ගැන ද කතා වෙයි. එජාපයේ තරුණ මන්ත්‍රීවරයකු ඇමතුම් දෙමින් එම මන්ත්‍රීවරයා ඇසුරු කර ඇති කාන්තාවන්ගේ ගණන පවා විමසන හඬපටයක්ද ඒ හඬපට ගොන්නේ ඇති බව සඳහන්ය.
මෙතෙක් විමර්ශනයට ලක් වී ඇති හඬපට ගොන්නේ වැඩි පුරම ඇතැයි පැවසෙන්නේ රන්ජන් රාමනායක මන්ත්‍රීවරයා එජාපයේ තරුණ මන්ත්‍රීවරියක සමඟ කෙරෙන කතාබහය.
රන්ජන් රාමනායක මන්ත්‍රීවරයා පටිගත කර ගබඩා කර තිබී ඇත්තේ දුරකතන සංවාද පමණක් නොව, පාර්ලිමේන්තුවේ රැස්වීම් පැවැත්වෙන විට මැති ඇමතිවරුන් අසලට යමින් කෙරෙන කතාබහද ඔහු පටිගත කර ඇත්තේ වීඩියෝ පටිගත කිරීම් ලෙසිනි. මැති ඇමතිවරුන් කොමිස් ගන්නා හැටි ගැන මෙන්ම ඩීල් දමන හැටිද ඒ කතාබහ තුළ අඩංගුය. එම වීඩියෝ පටිගත කිරීම්වලින් සමාජ මාධ්‍ය ජාල ඔස්සේ එළියට විත් ඇත්තේ එක් වීඩියෝවක් පමණි. රන්ජන් රාමනායක මන්ත්‍රීවරයාගේ හඬපට සමාජ මාධ්‍ය ජාල වල ප්‍රසිද්ධ වෙන ආකාරය දෙස බැලීමේදී වැඩි කල් නොගොස් ඒ සෑම හඬපටයක්ම මෙන්ම වීඩියෝ පටයක්ම සමාජ ජාල මාධ්‍ය ඔස්සේ ප්‍රසිද්ධ වීම පුදුමයක් නොවනු ඇත.