තිසර සමල් – අනුරාධපුර

දරුවා පැහැර ගෙන ගිය 44 හැවිරිදි විදුලි කාර්මිකයාත්, ඔවුන්ට නවාතැන් දුන් පුද්ගලයින් දෙදෙනකුත් රිමාන්ඩ්…දරුවා රැගෙන ගිය ත්‍රී රෝද රථයත් පොලීස් භාරයේ..

එප්පාවල පොලිස් වසමේ කිරලෝගම, ගැටදිවුල ප්‍රදේශයේ පදිංචි 09 හැවිරිදි පිරිමි දරුවා පැහැර ගෙන ගොස් රිකිල්ලගස්කඩ ජොන්ස්ලන්ඩ් වතුයායේ නිවසක සඟවාගෙන සිටියදී සොයා ගැනීමට එප්පාවල පොලිස් ස්ථානයේ නිළධාරීන් කණ්ඩායමකට පසුගියදා (24) මධ්‍යම රාත්‍රියේ හැකි වී ඇත.

මෙලෙස පැහැර ගැනීමට ලක් වූයේ  අංක 16, ගැටදිවුල, කිරලෝගම ලිපිනයේ පදිංචි පී.කේ දෙනෙත් ගෞරව ප්‍රේමසුන්දර  නම් නව හැවිරිදි පිරිමි දරුවෙකි.ඔහු කිරලෝගම සුබෝධි මහා විද්‍යාලයේ සිව් වන වසරේ ඉගෙනුම ලබන සිසුවෙකි.

මෙම  සිසුවා එම ප්‍රදේශයේ විදුලි කාර්මික ශිල්පි ආයතනයක් පවත්වාගෙන ගිය විදුලි කාර්මික ශිල්පියකු සමඟ මීට මාස කීපයක සිට සමීප ඇසුරක් තිබූ බවත්, අදාළ විදුලි කාර්මිකයා දරුවා රවටා පැහැර ගෙන යන්නට ඇති බවට සැක කරන බවත් දරුවාගේ දෙමාපියන් එප්පාවල පොලීසියට පසුගිය 19 වැනි දින  රාත්‍රීයේ පැමිණිලි කර ඇත.

තම දරුවා පැහැරගෙන ගොස් ඇත්තේ දරුවා සමීපව ඇසුරු කළ ප්‍රදේශයේ විදුලි කාර්මිකයකු වන  ඇස්වැද්දුමේ අසේල ප්‍රියන්ත නම් 45 හැවිරිදි පුද්ගලයකු බවත්, ඔහු දරුවා රවටා රැගෙන යන්නට ඇති බවට සැකකරන බවටත් දරුවාගේ මව වන පුෂ්පා මල්කාන්ති මහත්මිය  හා යුධ හමුදා සෙබලකු වන දරුවාගේ පියාද මේ සම්බන්ධයෙන් එප්පාවල පොලීසියට සිදු කළ පැමිණිල්ලෙහි සඳහන්ව ඇත.

ඒ අනුව පොලිසීය වහාම ක්‍රියාත්මක වී පරීක්ෂණ ආරම්භ කර ඇති අතර, ඒ අනුව සිදු කළ පරීක්ෂණ වලදී  විදුලි කාර්මිකයා සන්තකයේ දරුවා සිටින බවට පොලීසිය අනාවරණය කර ගෙන ඇත.ඒ  අදාළ විදුලි කාර්මිකයා පැහැරගත් දරුවාද සමඟ  දරුවා පැහැරගත් දිනම (19)   රාත්‍රියේ නාවුල ප්‍රදේශයේ ඔහුගේ සහෝදරයකුගේ නිවසකට ගොස් එම නිවසේ රාත්‍රියේ රැදී සිට පසුදින  (20) අලුයම එම නිවසින් දරුවාද රැගෙන පිටත්ව උකුවෙල පිහිටි ඔහුගේ සහෝදරියකගේ නිවසකටද ගොස් ඇති බවට පොලීසිය අනාවරණය කර ගෙන තිබිණි.ඒ අනුව පොලිස් කණ්ඩායම් කීපයක් දරුවා සොයා  මාතලේ හා උකුවෙල ප්‍රදේශ වල හා අනුරාධපුරයේ  පරීක්ෂණ ආරම්භ කර ඇත. 

සැකකාර විදුලි කාර්මිකයා දරුවා රැගෙන ගිය දින සිට ඔහුට අයත් ජංගම දුරකථනය ක්‍රියා විරහිත කර තිබීම හේතුවෙන් ඉන් පසු දරුවා තබා ගෙන සිටින ස්ථානයක් සම්බන්ධයෙන් නිශ්චිත තොරතුරක් සොයා ගත නොහැකි වූ  අතර, පසුගිය 23 වනදා  පස්වරු 6.30 ට පමණ එම දුරකථනයෙන් හදිසියේම දරුවාගේ මවට ඇමතුමක් ලබා ගෙන දරුවා පැහැර ගත් විදුලි කාර්මික ශිල්පියා පවසා ඇත්තේ දරුවා හොඳින් ඉන්නා බවයි.තමන් අනුරාධපුර තලාව ප්‍රදේශයේ දරුවා සමඟ සිටින බවත්, කඩිනමින් දරුවා මව වෙත ලැබීමට සලස්වන බවත්,  දරුවාගේ ඉල්ලීම මත තමන් දරුවා රැගෙන ගිය බවද, හැකි නම් පොලීසියේ සිදු කළ පැමිණිල්ල ඉල්ලා අස්කර ගන්නා ලෙසත්, සැකකාර විදුලි කාර්මික ශිල්පියා දරුවාගේ මවට දුරකථනයෙන් පවසා ඇත.දරුවාද එහිදී මව සමඟ දුරකථනයෙන් කථා කර පවසා ඇත්තේ තමන් කැමැත්තෙන් මාමා (විදුලි කාර්මික ශිල්පියා) සමඟ පැමිණි බවත්, තමන් හොඳින් ඉන්නා බවයි.

කෙසේ වෙතත් ඔවුන් තලාව ප්‍රදේශයේ රැදී සිටින බව පැවසූවද අදාළ දුරකථන අංකය  ඔස්සේ ලැබුණු ඇමතුම පරික්ෂා කර එය රිකිල්ලගස්කඩ ප්‍රදේශයේ භාවිතා වන බවට තොරතුරු අනාවරණය වීමත් සමඟින් ඒ ඔස්සේ පරික්ෂණ පවත්වා දරුවා හා දරුවා පැහැර ගත් පුද්ගලයා රැදී සිටි  රිකිල්ලගස්කඩ, ජොන්ස්ලන්ඩ් වතුයායේ නිවසක රැදී සිටියෙදී  ඊයේ (23) මධ්‍යම රාත්‍රියේ එම නිවස වටලා ඔවුන් අත්අඩංගුවට ගැනීමට කටයුතු කර ඇත. දරුවා එප්පාවල සිට රැගෙන ගිය  විදුලි කාර්මික ශිල්පියාට අයත් ත්‍රීරෝද රථයද එම නිවසේ තිබී පොලිස් භාරයට ගෙන ඇත. මෙම දරුවාට හා දරුවා පැහැර ගෙන ගොස් සඟවා තබා ගැනීමට උදව් උපකාර කළ නිවසේ හිමිකරුද එම අවස්ථාවේදී අත්අඩංගුවට ගෙන ඇත.

දරුවා රඳවා ගෙන සිටි ජොන්ස්ලන්ඩ් වතුයායේ පිහිටි නිවසේ හිමිකරු වන නගර සභා සේවකයාගේ  පියා , මෙම දරුවා පැහැර ගැනීම සිදු කළ විදුලි කාර්මිකයා සමඟ වසර කීපයක් තලාව ප්‍රදේශයේ සේවය කරමින් සිටි  බවත්, ඒ හිතවත්කම මත  මීට පෙරද නිවසට එක් වරක් පැමිණි බවත්, පසුගිය 20 වැනි දින තම පියාගේ නිවසට පැමිණි මොවුන් එහි රැදී සිට,  පසු දින (21) ඔවුන් තමන්ගේ නිවසට පැමිණ, මෙම දරුවා තමන්ගේම දරුවා බව පවසා නිවසේ තබා ගෙන සිටි බවද පොලීසියට ප්‍රකාශ කර ඇත.තමන් නව නිවසක් ඉදි කරමින් පවතින බවත්, මෙම පුද්ගලයා එහි විදුලි පද්ධතිය සකස් කිරීමද පසුගිය දින වල සිදු කළ බවත් ඔහු පොලීසියට පවසා ඇත.

ඒ අනුව  එම නිවසේ සිටියදී අත්අඩංගුවට ගත් පැහැර ගැනීමට ලක් වූ දරුවා, පැහැර ගැනීම සිදු කළ විදුලි කාර්මිකයා හා ඔවුන්ට නවතැන් දුන් තිදරු  පියෙකු වන නගර සභා රියදුරුද ‍පොලිස් අත්අඩංගුවට ගෙන එප්පාවල පොලිස් ස්ථානය වෙත පසුගිය  (24) උදෑසන රැගෙන එනු ලැබීය.

අත්අඩංගුවට ගත් විදුලි කාර්මිකයා එප්පාවල ප්‍රාදේශීය රෝහලේ වෛද්‍යවරයකු වෙත යොමු කර වෛද්‍ය පරීක්ෂණයකට යොමු කළ අතර, එප්පාවල පොලිස් ස්ථානයේ කාන්තා හා ළමා කාර්යංශයේදී දරුවාගේ ප්‍රකාශයක් සටහන් කර ගැනීම සිදු  කෙරිණි. ඒ අනුව 19 වැනි දින රාත්‍රියේ නිවසින් රහසින් පිටත්වී, මාමාගේ (විදුලි කාර්මික ශිල්පියාගේ) කඩය අසලට පැමිණ ඔහුගේ ත්‍රී රෝද රථයට නැඟ සැඟවී සිටි බවයි. තමාව මහණ කරන බවට දෙමාපියන් පැවසූ නිසා, මහණ වීමට අකමැති බැවින්, ගෙදර හිටියොත් මාව මහණ කරයි, ඒ නිසා මාව ඈතකට එක්ක යන ලෙස මාමාට (විදුලි කාර්මික ශිල්පියා)  ඉල්ලා සිටි බවයි.ඊට පස්සේ නාවුල හා මාතලේ ප්‍රදේශයේ පිහිටි මාමාගේ නෑදෑ ගෙවල් වලට ගිහින් පස්සේ රිකිල්ලගස්කඩට ගියා, රිකිල්ලගස්කඩින් මගේ කොන්ඩෙත් කැපුවා, මාව හොයනවා කියලා මම ටී.වී එකෙනුත් දැක්කා.ඒත් මට ගෙදර එන්න හිතුනේ නෑ යැයිද දරුවා පවසා ඇත.

 අත්අඩංගුවට ගත් දරුවා පැහැරගත් විදුලි කාර්මිකයාද පොලීසිය වෙත ප්‍රකාශ කර ඇත්තේ, තමා දරුවාට කිසිදු කරදරයක් කර නැති බවත්, තමාගේම දරුවකු මෙන් දරුවා බලා ගත් බවයි.දරුවා තමන්ට ඇවිටිලි කරමින් කියා සිටියේ ගෙදර ඉන්න බෑ, ඔයා මට උදව් නොකලොත් මං සියදිවි හානි කර ගන්නවා කියලා.ඒ නිසා දරුවාගේ ඉල්ලීමට මං දරුවාට ආදරේට , එයාව අරගෙන ගියේ යනුවෙනි.

ඔවුන්ට නවාතැන් දුන් පුද්ගලයාගෙන්ද ප්‍රකාශ සටහන් කර ගෙන ඇති අතර, ඔහු ප්‍රකාශ කර ඇත්තේ තමාගේ පියා තලාව ප්‍රදේශයේ ආපන ශාලාවක කොත්තු බාස්වරයකු ලෙස කටයුතු කළ බවත්, එහිදී හදුනාගත් ප්‍රියන්ත නම් පුද්ගලයා හා දරුවාද සමඟ තම පියා පසුගිය 21 නිවසට පැමිණි බවත්.එම දරුවා තමන්ගේ දරුවා බවද, බිරිඳ විදේශගතව සිටින බවද පවසා. නිවසේ නතර වීමට ඉල්ලා සිටි බවයි. තම නිවස ඉදි කරමින් පවතින අතර, එහි විදුලි පද්ධතිය සකස් කිරීමද ප්‍රියන්ත නැමැත්තා පසුගිය දින වල සිදු කළ බවද නවාතැන් දුන් නිවසේ හිමිකරු පවසා ඇත.මෙම දරුවා පැහැර ගෙන පැමිණි දරුවකු බව තමන් නොදන්නා බවද, රූපවාහිනියෙන් හෝ මෙම සිද්ධිය සම්බන්ධයෙන් දැනුම්වත් නොවුන බවද ඔහු වැඩිදුරටත් පවසා ඇත.

දරුවා හා දරුවා පැහැර ගෙන ගිය විදුලි කාර්මික ශිල්පියාද අනුරාධපුර ශීක්ෂණ රෝහලේ අධිකරණ වෛද්‍යවරයා වෙත යොමු කළ අතර, ඒ වන විටත් දරුවා තරමක තරමක අසනීප තත්වයක් පෙන්නුම් කිරීම හේතුවෙන් අනුරාධපුර ශීක්ෂණ රෝහලේ 24 වාට්ටුවට ඇතුළත් කර ඇති අතර, දරුවා එහි නේවාසිකව ප්‍රථිකාර ලබයි.මෙතෙක් සිදු කළ පරීක්ෂණ අනුව දරුවාට ලිංගික අතවරයක් හෝ අපහරණයක් සිදු වී නැති බවට වාර්ථා වේ.

අනතුරුව, සැකකාර විදුලි කාර්මික ශිල්පියා හා ඔවුන්ට නවාතැන් දුන් නිවසේ හිමිකරු තඹුත්තේගම මහේස්ත්‍රාත්වරයා හමුවට ඉදිරිපත් කළ අතර, ජනවාරි මස 04 වැනි දින දක්වා රක්ෂිත බන්ධනාගාර ගත කරන ලෙස තඹුත්තේගම මහේස්ත්‍රාත් එම්.එල් නුවන් කෞෂල්‍ය මහතා නියෝග කළේය.

නීත්‍යාණූකූල භාරකාරත්වයෙන් අපහරණය කිරීමේ චෝදනාව මත මෙලෙස රක්ෂිත බන්ධනාගාර ගත කෙරුණේ 09 හැවිරිදි පිරිමි දරුවා පැහැර ගෙන යාමේ සිද්ධියට සම්බන්ධ ප්‍රධාන සැකකරු වන 22 කණුව, කැකිරාව පාර, තලාව ලිපිනයේ පදිංචි ඇස්වැද්දුමගේ අසේල ප්‍රියන්ත ප්‍රනාන්දු  නම් විදුලි කාර්මික ශිල්පියා හා  අපහරණයේ කිරීමේ චෝදනාවට ආධාර අනුබල ලබා දීමේ චෝදනාව මත දරුවා රැගෙන එප්පාවල ප්‍රදේශයෙන්  පළා ගොස් සැඟවී සිටිමට උපකාර කළ ජොන්ස්ලන්ඩ් වතුයායේ නිවසේ හිමිකරු වන අමිල සම්පත් කුමාර නානායක්කාර නම් 42 හැවිරිදි තිදරු පියෙකි. ඔහු රිකිල්ලගස්කඩ නගර සභාවේ රියදුරෙකු වශයෙන් සේවය කරන පුද්ගලයෙකි.

එම නිවසේ හිමිකරුගේ පියාද එප්පාවල පොලිස් ස්ථානයට පැමිණ භාර වීමෙන් අනතුරුව අත්අඩංගුවට ගෙන ඔහුද  ඊයේ (25) පෙරවරුවේ නීත්‍යාණූකූල භාරකාරත්වයෙන් අපහරණයේ කිරීමට ආධාර අනුබල ලබා දීමේ චෝදනාව මත අධිකරණයට ඉදිරිපත් කිරීමෙන් අනතුරුව ජනවාරී 04 දක්වා රක්ෂිත බන්ධනාගාර ගත කරන ලෙස තඹුත්තේගම මහේස්ත්‍රාත් එම්.එල් නුවන් කෞෂල්‍ය මහතා නියෝග කළේය.මෙලෙස රක්ෂිත බන්ධනාගාර ගත කෙරුණේ එන්.එන්.ජී.ඩී සිරිසේන නානායක්කාර නම් 74 හැවිරිදි පුද්ගලයෙකි.

දරුවා රෝහලෙන් පිටව පැමිණි පසු , දරුවාගේ වෛද්‍ය පරීක්ෂණයෙන් ලැබෙන වාර්ථා සමඟ දරුවාද තඹුත්තේගම මහේස්ත්‍රාත් අධිකරණයට ඉදිරිපත් කිරීමට නියමිත බව එප්පාවල පොලීසිය පවසයි.

එප්පාවල පොලිස් ස්ථානාධිපති ඊ.අයි.එස් ඒකනායක මහතාගේ උපදෙස් මත, අපරාධ පරීක්ෂණ අංශයේ ස්ථානාධිපති උප පොලිස් පරීක්ෂක එස්.ඩබ්.පී.ආර් ජයම්පති, පොලිස් සැරයන් 3694 අයි.ජී ඉරුගල්, පොලිස් කොස්තාපල්වරුන් වන 67338 ජයසිංහ, 68606 එරංග යන නිළධාරීන් පරීක්ෂණ සිදු කර දරුවා ඇතුළු සැකකරුවන් අත්අඩංගුවට ගැනීම සිදු කර තිබිණි.

සිද්ධිය සම්බන්ධයෙන් එප්පාවල පොලීසීය වැඩිදුර පරීක්ෂණ සිදු කරයි.