ජනාධිපතිතුමනි / යුද හමුදාපතිතුමනි ශ්‍රී ලංකා යුද හමුදාවේ මනෝ වෛද්‍ය ඒකකය පුහුණු කිරීමට විශේසඥ මනෝ වෛද්‍ය නීල් ප්‍රනාන්දු මහතාට භාර දෙන්න
Posted on April 5th, 2025
වෛද්‍ය ගාමිනී විතාණ
මෑතකදී කොළඹ මහාධිකරණය ලබාදුන් තීන්දුවකින් 2015 දී දෙමටගොඩ වනාතමුල්ල ප්‍රදේශයේදී හෙට්ටිආරච්චිගේ දුමින්ද නමැති පුද්ගලයකු වෙඩි තබා මරා දැමීම පිලිබඳව නඩුවකින් එම්.කේ සරත් බණ්ඩාර හෙවත් SF සරත් යන අන්වර්තයෙන් හැදින්වෙන පුද්ගලයකු වරදකරු කොට මරණීය දණ්ඩනය ලබා දෙන ලදි. මෙම සරත් බණ්ඩාර තමන්ගේ සේවා කාලය තුලදී කොටින්ට එරෙහි සටනේදී විශිෂ්ඨ දායකත්වයක් ලබාදී ඇති වචනයේ පරිසමාප්තියෙන් නියම සොල්දාදුවෙකු වන අතර සෙසු නිලයින් අතර ලබාගත හැකි ඉහලම නිලය වන බලලත් නිලධාරි 1 ශ්‍රේණියට උසස්වීම ලැබූවෙක්. විශේෂ බළකායේ කුඩා කණ්ඩායම් මෙහෙයුම් වල යෙදී බොහෝ සාර්ථකත්වයන් ලැබූ අයෙකි. පසුගිය වසර කීපය පුරා මෙවැනි සොල්දාදුවෝ දිවි නසාගත් හෝ පාතාලය විසින් බිලි ගනු ලැබීය. යුද ආතතියට ගොදුරු වූ මෙවැනි සොල්දාදුවන්ට නිසි මනෝ ප්‍රතිකාරයක් හෝ පුනරුත්තාපනයක් නොලැබීමද මේ සඳහා එක් හේතුවකි.
විශේසඥ මනෝ වෛද්‍ය නීල් ප්‍රනාන්දු මහතා ශ්‍රී ලංකා යුද හමුදාවේ මනෝ වෛද්‍ය අංශයට සේවය ලබා දුන් කාලයේ ක්‍රමානුකූලව යුද ආතතියට ලක් වූ සොල්දාදුවන්ට නිසි මනෝ ප්‍රතිකාර ලබා දෙනු ලැබීය. එතුමා ඉවත් වීමත් සමග ශ්‍රී ලංකා යුද හමුදාවේ මනෝ වෛද්‍ය ඒකකය බිඳ වැටුනු බව සත්‍යකි. වර්තමානයේ යුද හමුදාවේ මනෝ වෛද්‍ය ඒකකය නාමිකව පවතින් අතර නිසි අත්දැකීම් දැණුමක් හෝ දැක්මක් නොමැති නිලධාරීන් විසින් මෙම ඒකකය හසුරවනු ලබයි. මේ නිසා යුද හමුදා ස්ක්‍රිය සේවයේ මෙන්ම විශ්‍රාම ගිය සොල්දාදුවෝ නිසි මනෝ ප්‍රතිකාර හෝ මනෝ පුනරුත්ථාපනයක් නොමැතිව වල්මත් වී සමාජය පුරා සැරි සරති. මෙහි දුර්විපාක අත් විඳින්නේ මුලු මහත් සමාජයයි. මේ තත්වය තුරන් කිරීම සාමූහික ජනතා වගකීමකි. මේ නිසා මනෝ ප්‍රතිකාරයන් , යුද ආතතිය , යුද මනෝ විද්‍යාව පිලිබඳ හසල දැණුමක් තිබෙන විශේසඥ මනෝ වෛද්‍ය නීල් ප්‍රනාන්දු මහතාට ශ්‍රී ලංකා යුද හමුදාවේ මනෝ වෛද්‍ය ඒකකය නිසි ලෙස පුහුණු කිරීමට භාර දෙන ලෙස ඉල්ලා සිටිමු.
වෛද්‍ය ගාමිනී විතාණ