රජය සාර්ථක විසදුම් සමග අප ක්‍රමයෙන් එම අසීරු තත්ත්වයෙන් අත්මිදෙමින් සිටිනවා.-අග්‍රාමාත්‍ය දිනේෂ් ගුණවර්ධන මහතා
Posted on June 17th, 2023
අග්‍රාමාත්‍ය මාධ්‍ය අංශය.
එදා දෙවෙනි ලෝක යුධ සමයේ අප මුහුණ දුන් දුෂ්කරතාවලට සමාන තත්වයකට අපගේ තරුණ ප්‍රජාව පසුගිය සමයේ මුහුණ දුන්නා.
රජය සාර්ථක විසදුම් සමග අප ක්‍රමයෙන් එම අසීරු තත්ත්වයෙන් අත්මිදෙමින් සිටිනවා.-අග්‍රාමාත්‍ය දිනේෂ් ගුණවර්ධන මහතා
අග්‍රාමාත්‍යවරයා මේ බව සඳහන් කළේ 2023.06.17 දින අරලියගහ මන්දිරයේ පැවති රොටරි ඉන්ටර්නැෂනල් හි 33 වැනි දිස්ත්‍රීක් අන්තර් ක්‍රියාකාරී සමාජයේ සම්මේලනය අවස්ථාවේදීය.
එහිදී අදහස් දැක් වූ අග්‍රාමාත්‍යවරයා –
අද අපගේ තරුණ ප්‍රජාව ඉතා අසීරු පෙර නොවූ විරූ අභියෝගයකට මුහුණ දෙමින් සිටිනවා. එදා දෙවෙනි ලෝක යුධ සමයේ අප මුහුණ දුන් දුෂ්කරතාවලට සමාන තත්ත්වයක් අද අපගේ තරුණ ප්‍රජාව හමුවේ උද්ගත වී තිබෙනවා. වර්තමාන ජනාධිපති රනිල් වික්‍රමසිංහ ප්‍රමුඛ ආණ්ඩුව එම අර්බුධකාරී වාතාවරණයට සාර්ථක විසදුම් අත්හදාබලමින් සිටින අතර අප ක්‍රමයෙන් එම අසීරු තත්ත්වයෙන් අත්මිදෙමින් සිටිනවා.
‘Service Above Self’ යන පරමාදර්ශය වෙනුවෙන් කැපවෙමින් ප්‍රජාවගේ ප්‍රයෝජනය සඳහා වටිනා ව්‍යාපෘති රාශියක් ක්‍රියාත්මක කරන සංවිධානයක් වන රොටරි ඉන්ටර්නැෂනල් හි 33 වැනි දිස්ත්‍රීක් අන්තර් ක්‍රියාකාරී සමාජය එහි සමාජීය වැඩසටහන් හරහා මිනිසුන් අතර වඩා හොඳ අවබෝධයක් ඇති කරනවා. එමගින් ලබා ගන්නා අන්තර්ජාතික පිලිගැනීම තරුණ ප්‍රජාවට මෙන්ම හ්‍රී ලංකාවටත් මහගු ප්‍රතිලාභයක්.
අන්තර් ක්‍රීයාකාරී සමාජ මගින් ඔබට යහපත් අරමුණක් සඳහා වෙනත් පුද්ගලයින් සමඟ වැඩ කිරීමට අවස්ථාව ලබාදෙනවා. එකිනෙකා අතර අවබෝධය පුළුල් කරන මෙවැනි ව්‍යාපෘති, සමාජ ක්‍රීයාකාරකම් ඉතා වැදගත් වන අතර තරුණයින් රොටරි වැඩසටහන්වලට සහභාගී වීමෙන් ඔවුන්ගේ ජීවිත වෙනස් මගකට යොමු කල හැකි වෙනවා. ඒ පන්නරය තුලින් බිහිවන ශක්තිමත් පුරවැසියා අප ජාතියේ ඉදිරි ගමනට ඉතා වැදගත් වෙනවා.
සෑම අන්තර් ක්‍රීඩා සමාජයක්ම ඔබේ පාසලට හෝ ප්‍රජාවට උපකාර වන එක් ව්‍යාපෘතියක් සහ ජාත්‍යන්තර අවබෝධය ප්‍රවර්ධනය කරන එක් ව්‍යාපෘතියක් වශයෙන් වසරකට සේවා ව්‍යාපෘති දෙකක් ක්‍රීයාත්මක කළ යුතුයි. මෙම සේවා ව්‍යාපෘති ඔබට මෙරට සහ විදේශයන්හිදී කටයුතු කිරීමට සහ අනෙකුත් තරුණ නායකයින් සමඟ සම්බන්ධ වන්න ඵලදායී ක්‍රමයක්.
විවිධ පසුබිම්, සංස්කෘතීන් සහ ආගම්වල පුද්ගලයින් අතර අවබෝධය ප්‍රවර්ධනය කරන බැවින් අන්තර් ක්‍රීඩා සමාජයකට සම්බන්ධ වීම ඔබේ තරුණ මනස අර්ථවත් බවට හැඩගැස්වීමට ජීවිතය වෙනස් කරන මගක්.
ඔබට සමාජ වගකීමක් තියෙනවා. ළමා නිවාසවල, අනාථ නිවාසවල, වැඩිහිටි නිවාසවල සහ පොදු ස්ථානවල පිරිසිදු කිරීම්, පාරිසරික ක්‍රීයාකාරකම්වලදී වැනි වෙනත් වැඩ කටයුතු තරුණයන් අතර සමාජ වටිනාකම් වැඩි දියුණු කිරීමට සමත් වෙනවා. බහුතරයකගේ නොදැනුවත්කම සහ ආත්මාර්ථකාමීත්වය නිසා තර්ජනයට ලක්ව ඇති අපේ පරිසරයට මේවායින් ආදරයක් ද ඇති කරනවා .
එවැනි අන්තර් සමාජ ක්‍රීයාකාරකම් මගින් නිර්මාණාත්මක නායකත්වය සහ පුද්ගලික අඛණ්ඩතාව වර්ධනය කිරීම නිවසේ සහ පවුලේ වැදගත්කම මෙන්ම අන් අයට උපකාර කිරීමේ අවශ්‍යතාවය සහ ස්වයං-සංවර්ධනය, කාල කළමනාකරණය සහ පුද්ගලික මූල්‍ය කළමනාකරණ හැකියාව පිළිබඳව දැනුවත් කිරීමක් ඇති කරනවා. සමාජයට සේවය කිරීම සඳහා ප්‍රයෝජනවත් වෘත්තීන් සහ අවස්ථාවන් ඒ තුළින් හදුනාගැනීමේ හැකියාව ඔබට ලැබෙනවා.
තවද, අන්තර් සමාජය ජාලකරණය හරහා බෙදාගැනීම සහ අන් අය පිලිබඳ සොය බැලීම හා පිහිටවීම ප්‍රවර්ධනය කරනවා. අන්තර් සමාජයන් හී අරමුණ වන්නේ සේවය සහ ජාත්‍යන්තර අවබෝධය සඳහා කැප වූ ලෝක සහයෝගීතාවයක තරුණයින්ට එකට වැඩ කිරීමට අවස්ථාවක් ලබා දීමයි. ලෝකය පිළිබඳ අවබෝධය පුළුල් කරන සහ හොඳ හිත ප්‍රවර්ධනය කරන ජාත්‍යන්තර සේවා ව්‍යාපෘති සංවර්ධනය කිරීමට මේවා ප්‍රයෝජනව. Interact Club යනු අන්තර්ක්‍රීයා සහ සමාජ වැඩ සඳහා සුවිශේෂී සංසදයක් මෙන්ම සදාචාරාත්මක වටිනාකම්, කුසලතා සහ තරුණ නායකත්වය වර්ධනය කිරීම සඳහා අගනා වේදිකාවක් බව මගේ හැඟීමයි. සාක්ෂරතාවය යන්න අද වන විට අප එදා ඇසූ සංකල්පයට වඩා එහා ගිය අරුතක් ඇති සංකල්පයක්. එමගින් ලිවීම , කියවීම පමණක් නොව ජාලගත වීමත්, තාක්ෂණය හා ඉදිරියට යාමත්, අන්තර් සම්බන්ධතාවය වැඩි දියුණු කර ගැනීමත් නිරූපණය වෙනවා.
පසුගිය වසරේ අන්තර් සමාජය වැඩසටහන් වලදී දක්ෂතා දැක් වූවන් වෙනුවෙන් සම්මාන පිරිනැමීමද මෙහිදී සිදුකෙරිණි.
මෙම අවස්ථාවට රොටරි ඉන්ටර්නැෂනල් හී 105 වැනි සභාපති කේ. ආර්. රවීන්ද්‍රන්, Interact Club හී වත්මන් සභාපති ඩේමියන් ඩීකෘස්, හිටපු සභාපති ජූලියන් ෆර්ඩිනෑන්ඩස්,යන අය සහභාගී වූහ.
අග්‍රාමාත්‍ය මාධ්‍ය අංශය.